AZƏRBAYCAN MİLLİ ELMLƏR AKADEMİYASI

Abbasqulu Ağa Bakıxanov adına

TARİX İNSTİTUTU

Yaqub Mahmudov Beynəlxalq Türk Akademiyasının da həqiqi üzvü seçildi

03.07.2019 21:48

Azərbaycan Milli Elmlər Akademiyasının (AMEA) Tarix İnstitutunun direktoru, akademik Yaqub Mahmudov Türk Dünyası Araşdırmaları Beynəlxalq Elmlər Akademiyasının həqiqi üzvü seçilib və türk dünyası elminə verdiyi böyük töhfələrə görə Akademiyanın “Beynəlxalq Qızıl Ulduz” medalına layiq görülüb.

Elmi Şuranın iclasında Türk Dünyası Araşdırmaları Beynəlxalq Elmlər Akademiyasının Azərbaycan üzrə nümayəndəsi, professor Elçin İsgəndərzadə Akademiyanın diplomunu, “Beynəlxalq Qızıl Ulduz” medalı və vəsiqəsini, mantiyanı Yaqub Mahmudova təqdim edib.

E.İsgəndərzadə deyib ki, Akademiyanın medalına türk dünyasının çox məşhur insanları Süleyman Dəmirəl,  Rauf Denktaş, Çingiz Aytmatov, İhsan Doğramacı və başqaları layiq görülüblər: “Azərbaycandan Akademiyanın həqiqi üzvlüyünə görkəmli alimlərimiz Ramiz Mehdiyev, Arif Paşayev, Cəmil Əliyev, Xoşbəxt Yusifzadə və başqaları seçiliblər. Yaqub Mahmudov 1000-dən çox elmi əsərin müəllifidir, onun  15 cildlik “Seçilmiş əsərləri” var. O, milli-azadlıq hərəkatının gerçək qəhrəmanlarından biridir”.

Tarixçi alim təltiflərə görə Türk Dünyası Araşdırmaları Beynəlxalq Elmlər Akademiyasına təşəkkür edərək bildirib ki, bu, yalnız ona yox, həm də Tarix İnstitutunun fəaliyyətinə və alimlərinə verilən çox böyük qiymətdir. O, Akademiyaya ikicildlik “Azərbaycan Xalq Cümhuriyyəti Ensiklopediyası”nı hədiyyə edib.

Paylaş: